الأحد، 13 ديسمبر 2009

الشاب السياسى

لقب الشاب السياسى ، زى الشاب الفنان ، الشيخ الخ القاب سهل اوى تحصل عليها فى مصر دلوقتى فى مجتمع يصدر احكامه من الظاهر لا من الباطن .عايز تبقى شيخ و كل الناس تقدرك بسيطة ربى ذقنك و البس جلبيه او قصر البنطلون ، عايز تاخد لقب الفنان البس نضاره شمس و اشترى جيتار ب 150 جنيه و امشى بيه على طول فى الشارع . عايز تبقى سياسى ابسط و ابسط مجرد انك تشتم بس فى الحكومة و تقول عليهم حرامية و تحط صورة على الفيس بوك لجمال مبارك عليه اكس حمره كده بقيت سياسى منتهى البساطة اللى فى الدنيا .لما تكون شاب او شابه ضعيف الشخصية بتعانى من الفراغ ، مش مكتشف موهبتك و ملكش هدف من الحياة . ساعتها ممكن تاخد دور السياسى هيحققلك كل النقص اللى عندك و من غير تعب . الانترنت سهل علينا كل شىء . و هتبقى انت الفريد من نوعك وسط الشباب و مين عارف ممكن تقابل ناس شباب زيك تانيين و مش بس يبقى انترنت لا تنزلوا الشارع مش هتعملوا نشاط للناس و تتعب و بتاع لا لا اوعى تفهم غلط !هتروحوا عالقهوة تتجمعوا و تقفوا عالسلالم تجعجعوا و الناس تتفرج عليكم و الامن حوليكم ، يا سلام احساس جميل ايه الشجاعة دى .و لو كان عندك فراغ عاطفى ممكن تاخدلك صورة عالسلم و الامن حواليك و انت واقف اسد و مش خايف منهم و ساعتها هتظبط كتير مفيش احلى من جاذبية السياسى .شوية شوية هتصدق الكذبة و هتحس انك اسمى و اعلى من الناس اللى حواليك انت السياسى المهموم باوهام الوطن اللى مش ساكت ، الحر اللى مش زى الناس الباقية العبيد .و ممكن تبقى مادة خام لناس تانية منها تستفيد ، الحكومة تستفيد منك عشان تثبت للعالم ان عندها حرية تعبير و ديمقراطية و انت الدليل .او الناس التانيين الوحشين اللى فى الغرب بعد المحيط الاطلنطى و اللى فى الشرق بعد الخليج العربى يستخدموك لمصلحتهم داخل مصر . يعنى بقى ليك فايدة بدل ما كنت نكره .و لو جيه حد يسألك طب فين نتيجة سياستك يا سياسى الدنيا من حوالينا متغيرتش ليه مغيرتهاش ليه ده مش ذنبك لانك مش هتغير لوحدك و انت متقدرش تغير البلد لوحدك .أى نعم كان فيه سياسيين زمان افراد لوحدهم عملوا فرق و غيروا لكن دول كانوا سياسيين غيرك مينفعش معاك النظام بتاعهم ، دول ناس درسوا و صرفوا و اشتغلوا و تعبوا و كدحوا .لكن انت مش محتاج لكل ده انت مش محتاج تدرس سياسة عشان تبقى سياسى ولا محتاج تشتغل ليل نهار و تتعب مجرد استاتس و صورة بروفايل حلوة كده على زوقك هتوصل الفكرة و وقفة جعجعة كل شهر ولا شهرين .و كده تبقى انت سياسى بطل مناضل من غير تعب ولا وجع دماغ .هل معنى ده ان كل الشباب اللى بنسمع عنهم فى المعارضة على نفس الوتيره لا بالطبع انا مقصدتش ده لكن للاسف الاغلبية بتبقى على نفس الوتيره و النموذج ده من الشباب بيكون عامل فشل فى اى مشروع حراك سياسى .